之前以為橫濱離東京好遠, 但係前排聽到同學話週末去咗橫濱玩, 原來喺涉谷搭車45分鐘就到, 都好近啫. 揀今日星期日去唸住人多d熱鬧d, 果然好多人同我一樣一早就搭車嚟喇!
搭東急東橫線到みなとみない站一出就係Queen's Square商場, 行出平台就見到摩天輪, 隔離係風帆形設計無敵海景嘅洲際酒店. 經過摩天輪身處嘅Cosmo World遊樂場同World Porters商場, 就會到達第一個目的地紅磚倉庫.
紅磚倉庫係由舊貨倉改裝而成, 出自日本建築大師手筆, 有成90幾年歷史, 分為1號同2號倉兩座, 依家裡面主要賣有藝術特色嘅雜貨同餐廳露天cafe. 自己鍾意呢度嘅外面多過裡面, 因為出面有個好大嘅廣場又喺海邊, 吹吓海風都不知幾舒服! 
喺海邊望過去見到有隻好大好長似船嘅物體伸咗出海, 上面有d草又有d人行行吓, 原來係船形設計嘅橫濱港大さん橋國際客船碼頭. 碼頭嘅頂部舖滿木甲板同草皮, 設計到好似船嘅甲板咁俾人遊覽睇風景, 呢個設計好簡樸自然, 坐喺度睇風景又夠高同個海又近, 簡直係絕呀!
睇介紹同聽人講都話橫濱中華街無咩特別可去可唔去, 但係不竟中華街都係橫濱一個著名嘅代表, 所以無咩大期望都想去見識吓. 又無想像中咁差喎, 整個範圍都唔細有好幾條大街又有橫街, 主要係酒樓小食店多, 亦有d賣中國特色嘅紀念品同雜貨, 我買咗兩盒中華街限定人氣no.1拉麵味硬糖, 超搞笑!
可能今日係星期日到處迫滿人好熱鬧, 仲係日本人多個個好雀躍周圍行周圍買小食, 有d酒樓標榜飲茶嘅仲大排長龍添, 似乎佢地都幾鍾意中國菜喎!
想食lunch但唔想喺中華街食, 去咗coffe chop食三文治飲咖啡. 之後行咗去附近嘅元町住宅區, 原來中華街位處嘅呢區就叫做元町, 所以個車站叫做元町中華街站. 呢度有條有d歐陸feel嘅元町商店街, 賣貴價d嘅生活雜貨, 不過連LV都有應該幾高尚.
之後行咗去橫濱公園同體育館, 個體育館有d似我地嘅紅館, 啱啱有活動所以成個公園都迫滿年輕人. 行經呢條大街又好似去咗歐洲咁, 兩旁種滿樹建築物又矮仲有露天cafe, 好悠閒呀!
之後去咗橫濱市開港紀念會館參觀, 遇到一個好熱心嘅職員叔叔帶我到處參觀, 有佢帶住就可以入教室睇學員整玻璃畫同入演奏廳睇鋼琴表演, 佢仲好有心機咁介紹紀念會館同關東大地震嘅歷史, 雖然只係聽到少少, 但已經好感動啦!
橫濱靚在到處都係海, 靚在摩天輪遊樂場, 靚在古老建築物, 靚在優遊自在, 但係呢度嘅日景夜景絕對唔可以錯過!
要睇橫濱360度全景一定要去The Landmark Tower. 呢度69樓嘅Sky Garden係全日本最高嘅展望台, 有273米咁高, 比起東京鐵塔250米嘅特別眺望廳更高, 我上次淨係去咗150米嘅大眺望廳添咋. 仲可以喺40秒以每分鐘750米速度到達69樓, 快到耳仔都塞埋!
Sky Garden入場費1000円, 我覺得呢度比起其他去過嘅展望台更值得去, 因為喺呢度睇橫濱嘅景色實在好震撼! 陸地海岸線睇得一清二楚, 好似坐飛機睇落去咁, 好得意!
又見到有人行婚禮喇, 喺呢度比台場日航酒店彩虹橋景好嘅地方, 係多咗遊覽嘅人在旁為你歡呼, 我都有拍手架!
...
