手作仔嘅精髓, 在於即使同款式同質料, 但每件作品都唔會一模一樣, 睇吓橙餅同pink lady就知啦!  

做過大中細size嘅熊仔, 整中size比較快同易, 決定做對twins. 一次過裁2種布, 交換耳朵手板腳板就得喇!

上次整咗黑波點覺得好靚, 記得有塊紅色嘅同款布, 整埋佢可以襯成一對, 有盤啦!   

今次用最細嘅紙樣整咗隻迷你熊, 細細粒真係好可愛, 雖然細隻啲縫得快啲, 不過比起大size嘅熊更難整.

用同一個紙樣整咗6隻熊仔啦, 想繼續整但係想轉吓款, 搵到本整熊仔書copy咗啲新紙樣. 用做大毛剩番嘅毛布整小毛, 試吓手板同腳板用另一種布做, 都唔錯喎!

好鍾意呢塊波點布, 覺得用佢嚟整熊仔應該會幾型, 果然唔錯喎! 

12月尾收到一齊喺日本讀書嘅台灣好朋友C郵寄俾我嘅賀年咭, 真係開心到不得了, 於是即刻整咗格仔男越洋送俾佢, 加埋佢鍾意嘅Hello Kitty牌仔, 友誼永固呀!

之前買咗塊白色嘅皮, 質感好但唔知用嚟整咩好, 試吓整熊仔, 嘩, 塊皮好硬縫到手都痛, 不過出嚟嘅效果好好, 小皮氣入型入格, 唸落都值得嘅, 不過佢好可能係我唯一嘅皮製熊仔喇!

呢塊布係由我件古著衫剪出嚟嘅, 件衫唔想再著但又覺得塊布幾靚, 咁最好就係學日本環保手作法, 將塊布循環再用.